វេទិកាពិភាក្សាតុមូល ក្រោមប្រធានបទ “រួមគ្នាប្រឆាំងព័ត៌មានក្លែងក្លាយ នៅក្នុងប្រទេសកម្ពុជា”

សមាគមអ្នកសារព័ត៌មានកម្ពុជាចិន (សសកច-CCJA) នាព្រឹក ថ្ងៃសុក្រ ទី២៤ ខែកុម្ភៈ ឆ្នាំ២០២៣បានរៀបចំវេទិកាពិភាក្សាតុមូលក្រោមប្រធានបទ “រួមគ្នាប្រឆាំង ព័ត៌មាន ក្លែងក្លាយ នៅក្នុងប្រទេសកម្ពុជា” ចាប់ពីម៉ោង៩៖០០ព្រឹកដល់ម៉ោង ១១៖០០ព្រឹកនាទីស្នាក់ការកណ្តាលរបស់ខ្លួននៅអគារសមាគមសម្ព័ន្ឋខ្មែរចិននៅកម្ពុជា ស្ថិតក្នុងបុរីរុងរឿង សង្កាត់ព្រែកលៀប ខណ្ឌជ្រោយចង្វារ ភ្នំពេញ។

កិច្ចពិភាក្សាមានការអញ្ជើញចូលរួមពីសំណាក់ ឯកឧត្តម ផុស សុវណ្ណ ប្រតិភូរាជរដ្ឋាភិបាល និងជាអគ្គនាយករដ្ឋបាលនិងសោតទស្សន៍ នៃក្រសួងព័ត៌មាន ឯកឧត្តមបណ្ឌិត គី សិរីវឌ្ឍន៍ ប្រធានវិទ្យាស្ថានសិក្សាភាសាចិន នៃរាជបណ្ឌិត្យសភាកម្ពុជា លោក សយ សុភាព ប្រធាន លោក លីវ ស៊ាវគ័ង ព្រមទាំងសមាជិកគណៈកម្មាធិការនាយកនៃសសកច និងអ្នកសារព័ត៌មានមកពីបណ្តាអង្គភាពនានាក្នុងព្រះរាជាណាចក្រកម្ពុជា។
ឯកឧត្តម ផុស សុវណ្ណ ប្រតិភូរាជរដ្ឋាភិបាល និងជាអគ្គនាយករដ្ឋបាលនិងសោតទស្សន៍ នៃក្រសួងព័ត៌មាន បានបង្ហាញពីកិច្ចខិតខំប្រឹងប្រែងរបស់ក្រសួងព័ត៌មាន ក្នុងការប្រយុទ្ធប្រឆាំងព័ត៌មានក្លែងក្លាយ នៅក្នុងព្រះរាជាណាចក្រកម្ពុជា តាមគ្រប់ទិដ្ឋភាពច្បាប់ និងលិខិតបទដ្ឋានគតិយុត្តិ ដែលមានជាធរមាន នៅក្នុងព្រះរាជាណាចក្រកម្ពុជា។ “ក្រសួងបានបង្កើតយន្តការជាច្រើន តួយ៉ាងគ្រុបតេឡាក្រាម ៣០០០ និងបន្តធ្វើសេចក្តីព្រាងច្បាប់ស្តីពី សិទ្ធិទទួលបានព័ត៌មាន” ដែលនឹងចេញព្រមគ្នាជាមួយ សេចក្តីព្រាងច្បាប់ផ្សេងទៀត រៀបចំដោយក្រសួងមហាផ្ទៃ និងក្រសួងប្រៃសណីយ៍ ដែលយន្តការផ្លូវច្បាប់”។
ឯកឧត្តម ផុស សុវណ្ណ ប្រតិភូរាជរដ្ឋាភិបាល និងជាអគ្គនាយករដ្ឋបាលនិងសោតទស្សន៍ នៃក្រសួងព័ត៌មាន ក៏បានអំពាវនាវឱ្យសារព័ត៌មានកម្ពុជា និងចិន ដែលកំពុងបំរើការនៅក្នុងប្រទេសកម្ពុជា បន្តចូលរួមផ្សព្វផ្សាយព័ត៌មាន ព័ត៌មានពិត និងចូលរួមប្រឆាំងព័ត៌មានក្លែងក្លាយ នៅកម្ពុជា តាមគ្រប់លទ្ធភាព ក្នុងវិជ្ជាជីវៈរបស់ខ្លួន។
ឯកឧត្តមបណ្ឌិត គី សិរីវឌ្ឍន៍ ប្រធានវិទ្យាស្ថានសិក្សាភាសាចិន នៃរាជបណ្ឌិត្យសភាកម្ពុជា ក៏បានប្រសាសន៍លើកឡើងផងដែរ អំពីផលប៉ះពាល់ពីការផ្សាយព័ត៌មានក្លែងក្លាយ ដល់សេដ្ឋកិច្ច និងសង្គម ជាពិសេសទំនាក់ទំនងកម្ពុជា ចិន ។ តែយ៉ាងណាក៏ដោយ លោកក៏បានបញ្ជាក់ផងដែរថា ក្នុងនាមជាអ្នកស្រាវជ្រាវ ឯកឧត្តម តែងតែចុះទៅស្រាវជ្រាវដោយផ្ទាល់ នៅកន្លែងមួយចំនួនដែលរងការផ្សាយព័ត៌មានមិនពិតមួលបង្កាច់ ដូចជានៅខេត្តស្វាយរៀង និងខេត្តព្រះសីហនុ ជាដើម ដើម្បីស្វែងរកព័ត៌មានពិត។ ជាលទ្ធផល គឺមិនពិតដូចការផ្សព្វផ្សាយនោះទេ។
ឯកឧត្តមបណ្ឌិត គី សិរីវឌ្ឍន៍ បានកត់សម្គាល់ផងដែរថា ការរីកចម្រើនខាងបច្ចេកវិទ្យាព័ត៌មាន និងការលេចឡើងនូវបណ្តាញសង្គមជាច្រើន និងធ្វើឱ្យវិសាលភាពនៃការផលិតព័ត៌មានក្លែងក្លាយ កាន់តែខ្លាំងក្លា និងមានសកម្មភាពជាងមុន។ តែប្រការទាំងនេះ ត្រូវបានកាត់បន្ថយទៅវិញ ជាបន្តបន្ទាប់ តាមរយៈកិច្ចខិតខំប្រឹងប្រែងរបស់រាជរដ្ឋាភិបាល ក៏ដូចជាក្រសួងស្ថាប័នពាក់ព័ន្ធ រួមទាំងអង្គភាពសារព័ត៌មាន ផងដែរ។
លោក សយ សុភាព ប្រធានសសកច ក៏បានលើកឡើងផងដែរថា ក្នុងនាមសសកច និងក្នុងនាមលោកផ្ទាល់ បានចូលរួមជាមួយក្រសួងព័ត៌មាន ក៏ដូចជារាជរដ្ឋាភិបាល ក្នុងការប្រយុទ្ធប្រឆាំងព័ត៌មានក្លែងក្លាយ តាមគ្រប់លទ្ធភាពដែលខ្លួនមាន ជាពិសេសបន្តជំរុញការផ្សព្វផ្សាយលើកកម្ពស់ទំនាក់ទំនងដ៏ល្អ រវាងប្រទេសកម្ពុជា និងចិន ក៏ដូចជាភ្ញៀវទេសចរ និងវិនិយោគិនចិន។
លោក លីវ ស៊ាវគ័ង អនុប្រធាន សសកចក៏ចាប់អារម្មណ៍ផងដែរថា ក្នុងនាមអ្នកសារព័ត៌មាន យើងមានការភ្ញាក់រលឹក និងមើលឃើញច្បាស់ថាសព្វថ្ងៃនេះ ប្រព័ន្ធផ្សព្វផ្សាយលោកខាងលិចនៅតែក្តោបក្តាប់ឥទ្ធិពលរបស់ខ្លួនយ៉ាងខ្លាំង លើការផ្សព្វផ្សាយព័តមាន ពិសេសក្នុងការផ្សាយព័ត៌មាន អន្តរជាតិ ពួកគាត់នៅតែលំអៀងទៅខាងប្រទេសខ្លួននិងប្រទេសសម្ព័ន្ធមិត្ត តែចំពោះប្រទេសដែលមិន ស្តាប់បង្គាប់លោកខាងលិចវិញ គឺគេផ្សាយបែបរិះគន់ មួលបង្កាច់និងបំផ្លើសបំភ្លៃ។ ឧ. ថ្មីៗនេះព័ត៌មានស្តីពីការពិតនៃអាថ៌កំបាំង នៅពីក្រោយការបំផ្ទុះបំពង់បង្ហូរឧស្ម័ន ដែលទំលាយចេញដោយអ្នកសារព័ត៌មានជាន់ខ្ពស់អាមេរិកម្នាក់ ព័ត៌មានព្រឹត្តិការក្រលាប់រថភ្លើង បណ្តាលអោយធ្លាយចេញសារធាតុគីមី ដ៏មានគ្រោះថ្នាក់នៅអាមេរិក…បណ្តាញព័ត៌មានធំៗរបស់លោកខាងលិច សុទ្ធតែផ្សាយលំៗ ប៉ុន្តែបើចំពោះព្រឹត្តិការណាមួយដែលកើតឡើង ក្នុងប្រទេសគូសត្រូវវិញ ពួកគេផ្សាយបំប៉ោងនិងលាបពណ៌ ដែលនេះគឺបង្ហាញអោយមនុស្សក្នុងសកលលោក បានឃើញពីស្តង់ដារពីរ ដែលពួកគេអនុវត្ត ក្នុងការផ្សព្វផ្សាយព័ត៌មាន។
លោក ក៏រំលេចផងដែរថា “ឆ្នាំ២០២៣នេះ ជាឆ្នាំបោះឆ្នោតសកលនៅប្រទេសកម្ពុជា ព្រឹត្តិការកីឡាស៊ីហ្គេម ក៏នឹងប្រព្រឹត្តិទៅក្នុងឆ្នាំនេះដែរ។ ដូចនេះយើងសង្ឃឹមថាសារព័ត៌មានក្នុងស្រុកទាំងអស់ នឹងប្រកាន់នូវឥរិយាបទវិជ្ជាជីវៈ និង ស្មារតីទទួលខុសត្រូវក្នុងការផ្សព្វផ្សាយព័ត៌មានពិតដែលជាស្នាដៃនៃប្រទេសកម្ពុជារួមទាំង ព័ត៌មានការអភិវឌ្ឍដ៏ឆាប់រហ័សលើគ្រប់វិស័យរបស់ប្រទេសកម្ពុជា រួមគ្នាថែរក្សាស្ថេរភាព សន្តិភាព ដើម្បីឈានទៅលើកកំពស់កិត្យានុភាពប្រទេសកម្ពុជា លើឆាកអន្តរជាតិថែមមួយ កំរិតទៀត៕